حدود الدني – الأمين عجاج المهتار
مش عدل نغرق بالمدينة ونلتهي
بنوارها ونمشي
وهونيك بالضيعة العمر بينتهي
عدخنة اللقشي
مش ذوق نغطس بالنعيم ونلتهي
بالرقص والموضه
وهونيك بالضيعه الجحيم بينتهي
بالفقر والفوضى
لا درب سياره ولا سياره بتجي
عمطل هاك الريف
وعقول بغيوم الجهالة مبنجه
بتشتاق للتعسيف
هونيك بعدو عيب تعليم البنات
والجهل فخر كبير
والمشي بالعتم عدروب الحياة
حكمه وغنى تدبير!!
وبعدو جناب البيك حصة من السما
باسمو بينقسمو
ولو كحّل العينين بميال العمى
بيقدسوا إسمو!
وبعدا دموع العين حمرا معوكره
عاكعب هاك الحي
بوحل الطريق وعكر تفل المعصره
وغيرا ما فهش موي
وبعدا العيال بتفتخر بيدمها
ما بتنخلط بالغير!
والبنت يا بتاخذ خليفة عمّها
يا بتنزوي بالدير!
وبعدا الطوايف بالأسامي منمرّة
ومعرّبي بحارات!
وقلوب سودا بالضغينة مخمّرة
ونبضاتها نعرات!!
وستك يا “نجوى” مخمّنه حدود الدني
عحدود ضيعتنا
وناوي تخوض الانتخابات السنة
عن بنت عيلتنا.
