أربع سنوات من المغامرة – عن الموت والحياة والعشق – قيس جرجس

نصوص مختارة

لا تْقولوا ماتوا

قولوا فلّوا من بكْرا

متْل الرايح

ع مْبارح

صاروا بالذّكرى

هالدّنْيا متْل الكذْبة بْأوّل نيسان

متْل الندبة

معْ آخرْ دمْعة بحْزيْران

موتُنْ طبْشورة أسْرار اللوْحة كلّا

موتُنْ قصّة هالشّمْعة

ومْراية الله

*****

ماتوا قبل صوتُن

الْ كان أعلى من سقف موتُن

ما حدا عرْفُن بلا صوت

ولا تْعرّف عْليّن الموت

ولا عِرفْ من أيّا مدينة

كل المدن عنّا حزينة

كل المدن سكْنتْ صدى سْكوتُن

تا فِضت متْل وْجوهُن بْيوتُن

*****

وسْألت عن هالدني شجرة عتيقة

قالت:

عَن الريح

أوّل عازف ذكي للمُسيقا

بعْرى معا شي فصل متْل الحقيقة

وبلبس وْراق العزف كار السليقة

والضوّ

خالقْني بْحبر محبرة شَيخة طريقة

والميّ

ربّتني شرش عطشان يبلع بِريقا

والنار

شافتني غذا جوع بعيون الحريقة

والجوّ

حاسبني رئة للأرض متْل الصديقة

والناس

حسْبتني

متل بستان طعْمي الخليقة

ومرة متل متعة نظر بالحديقة

ومرة متل خشبة لَ إنقذ غريقا

ومرة لفن النحت تحفة رقيقة

ومرة متل بيت عصفور ورفيقة

وماني أنا

تهمة مرا

خَطّت عشيقا…